Ek Din Achanak Part 16

Agle din Sunday tha to Sonali school ja nahin sakti thi aur Jay se mulakat ka to sawal hi paida nahin hota. Uske papa Subah Subah hi gaon ke liye nikal gaye the apne bhai ke paas. Sonali ke mummy papa dono mein se kisi ne use is baare mein abhi tak nahin bataya tha.

Subah Sonali ki neend der se khuli kyunki raat bhar wo so nahin payi thi. Saari raat roti jo rahi thi. Subah koi 4 baje uski aankhon ne jawab de diya aur wo gehri neend mein chali gayi thi. Kareeb 9 baje uski neend khuli to usne dekha uske papa wahan hain nahin aur mummy ghar ke kaam mein busy hain. Usne apni mummy se papa ke liye poocha to unhone sirf itna bataya ki wo kisi kaam se gaon mein gaye hain.

Sonali ne fir ek baar baat karne ki koshish ki apni mummy se kaha “Mummy Jay bahut achha ladka hai. Aap log ek baar usse milkar to dekho. Mujhe yakeen hai aapko wo bahut pasand aayega. Humne koi galat kaam nahin kiya hai. Kya aapko mujh par jara bhi vishwaas nahin hai”

 Aunty ne kaha “Vishwaas to tumne tod hi diya hai hamara. Tum school mein padne jaati ho yaa ishq farmane. Aur mujhe bataya tha Raj ne ki Jay kaisa ladka hai. Uska khandaan kaisa hai. Usne tumhe jhoote pyaar mein fasanya aur tum poore parivar ki ijjat ko khakh mein milane ke liye uske peeche peeche chal di. Gharwalon ki ijjat tumhare liye koi mayne nahin rakhti. Aaj wo ladka tumhe humse jyada pyara hai. Agar tumhare dil mein Hamare liye jara bhi ijjat hai to tum aaj ke baad usse nahin milogi.

Sonali ki aankhon se aansu nahin poori nadi beh rahi thi. Use samajh mein nahin aa raha tha ki kya kare. Jitna pyaar wo Jay se karti thi usse kahin jyada wo apne mata-pita se karti thi. Jab uski mummy ke kahe shabd uske kano mein pade to aisa laga ki kisi ne uski antaratma ko jhakjhor diya hai. Aaj wo ek dorahe par khadi ho gayi thi. Ek taraf Jay tha jise wo beintiha pyaar karti thi aur wo bhi use jaan se jyada chahta tha wahi doosri taraf uske mata-pita the jinhone use janam diya tha. Kabhi doosre bachhe ke liye koshish bhi nahin ki taaki Sonali ko diye jaane wale pyaar mein kisi tarah ki kami na aaye. Uske har sukh dukh, har ichha, har jid ka barabar dhyaan rakha gaya. Wo isi kashmakash mein wapas aakar apne kamre mein chali gayi.

Idhar Uncle dopahar tak gaon pahunch gaye aur jaakar apne bhai se mile. Wahan jaakar chai naasta huya aur usne apne bhai se akele mein baat karni chahi. Uske bhai ne poocha “Bhaiya kya baat hai. Aap bahut pareshan hain. Ghar par sab theek to hai na. Mujhe to ghabrahat ho rahi hai”.

 “Nahin aisi koi baat nahin hai. Ghar par sab theek hai. Bas Sonali…”

 “Kuch nahin main soch raha tha uski shaadi kar di jaye”

 “Bhaiya ye to bahut khushi ki baat hai. Main to aapse kitni baar keh chuka tha lekin aap hi maante nahin the. Ab dekho apni Daya ki shaadi bhi ho chuki hai aur main nana banne wala bhi hoon”

 “Are waah ye to bahut khushi ki baat hai.”

 “Aap bekar hi uski padhai ke chakkar mein pade hain. EK ladki ko shaadi ke baad apne ghar chula-chauka hi karna hai na. To fir uske liye itna kya padhana. Haan ladka hota to hum use aage padhate, doctor ya engineer banate lekin ladki ko jyada padhana theek nahin. Aajkal ka mahol bahut kharab hai kab koi unch neech ho jaye kuch pata nahin. Isse to achha hai samay se apne sasural chali jaye to hum bhi ganga naha aaye.”

 “Bhai tum theek keh rahe ho. Meri mati maari gayi thi jo maine tumhari aur tumhari bhabhi ki baat nahin maani. Tumhari bhabhi ne bhi mujhe kai baar kaha tha ki Sonali ki jaldi shaadi kara do lekin mujhe uski padhai ki jyada chinta thi. Chal jo hua so hua ab koi achha sa ladka dekho to baat aage badhayen.”

 “Bhaiya bura na mano to ek baat poonchu”

 “Haan Bhai tumse kya bura manna. Poocho” Waise Uncle samajh gaye the ki wo kya poochna chahta hai.

 “Bhaiya kal tak aap keh rahe the ki ladkiyon ka bhi padhna bahut jaroori hai. Aajkal ladke aur ladki mein koi farak nahin hai. To aaj achanak uski shaadi ka khyaal kaise dimaag mein aa gaya.”

 “Main na kehta tha aapse ki ladkiyon ko sar par jyada nahin chadana chahiye. Khair abhi bhi koi der nahin huyi hai. Jaldi hi koi achha sa ladka dekhkar uski shaadi kara dete hain. Apne sasural mein chali jayegi to bas wahin ki hokar reh jayegi. ”

 “Bhai Sonali ke kuch hi din mein exams bhi khatam ho jayengi to uski shaadi kar denge. Tum bas ladke ki talash shuru kar do”

Ghar parivaar achha hai, jameen jaydad mein koi kasar nahin aur sabse badi baat ki wo eklauta hai. Agar wahan baat ban gayi to apni Sonali wahan aish karegi”

 “Theek hai bhai jaisa tum theek samjho aur baat karke jo bhi faisla ho mujhe bata dena. Ab main chalunga”

 “Bhaiya raat to yahin ruk jaate. Khana bhi tayyar hone wala hai.”

 “Nahin bhai kal Subah Subah ek party se milna bahut jaroori hai. Isliye abhi nikalne hoga. Ab to aana jaana laga hi rehna hai.”

 “Theek hai bhaiya jaisi aapki ichha.” Aur iske baad usne Uncle ko bus stand tak chod diya aur Uncle raat mein ghar aa gaye.

Raat mein Uncle aane mein late ho gaye lekin kal ki tarah aaj bhi Sonali ki aankhon se neend gaayab thi. Bas apne kamre mein chupchap padi thi. Achanak usne awaaz suni uncle ki aur uske kaan khade ho gaye. Dil bahut joron se dhadhak raha tha ki Sonali ke papa kya kehte hain kyunki Sonali ko uski mummy se pata chal gaya tha ki Uncle uski shaadi ke silsile mein gaon gaye hain. Sonali ko is samay bas unki baat sunni thi aur uski filhaal is baat ke alawa kisi baat mein ruche nahin thi.

Sonali ke papa aaye. Fresh huye, khana khaya aur gaon mein huyi saari baat apni patni ko bata di. Aunty bahut khus ho gayi aur kaha “Ab is kaam ko jaldi se nipta lo. Bhai sahab ne dekha hai ladka to achha hi hoga. Ab to jaldi se Sonali ke haath peele ho jayen aur hum ganga naha aayen. Bas yahi khwayish reh gayi hai.”

Isliye wo unki har ichha ka samman karega lekin achanak itni jaldi ye sab. Abhi to wo Jay se mili bhi nahin thi. Ab kya muh dikhayegi Jay ko wo. Kaise uska saamna karegi. Koi raasta bhi nazar nahin aa raha tha. Usne faisla liya ki wo ab school nahin jayegi. Apne dil par pathar rakh kar usne ye faisla to le liya lekin uska yahi faisla uske liye ghatak sidh hone wala tha.

Sonali ki aankhon se neend koso door ho gayi thi lekin aankhen ro ro kar sooj gayi thi. Itna bebas usne kabhi mehsoos nahin kiya tha apne aap ko. Uska dil bas inhi line ko dohra raha tha

Yeh hai mujhe ajmane ki koshish

Hai apne dil ko hasane ki koshish

Bahut yaad ayenge hum yaad rakhna

Agar tum karoge mujhe bhulane ki koshish

Koi dosti ab nibhata kahan hai

Karte hain bas dikhane ki koshish

Mohabbat ki hogi ye tauheen

Na karna game-dil sunane ki koshish

Idhar Jay ko holi ke baad pehli mulakat ka besabri se intezar tha. Halanki thoda dar bhi tha ki Sonali bahut gussa hogi kyunki wo Saturday ko nahin jaa paya tha aur Sunday ki chutti hone ke kaaran do din ka gap ho gaya tha lekin use pata tha ki jab Sonali ko pata chalega ki wo kis wajah se school nahin aaya to wo use maaf kar degi aur apni baahon mein samet legi. Idhar Jay ki aankhon mein bhi neend nahin thi. Wo bas kal ka intezar kar raha tha ki kab Subah ho aur kab wo apni Sonali se milne jaye. Lekin use pata nahin tha kal to kya ab wo kabhi Sonali se nahin mil payega. Uske dil mein bas Sonali ki yaadein thi aur unhen hi sochta huya kuch gunguna raha tha

Tu is tarah se meri jindagi mein shaamil hai Jahan bhi jaun lagta hai teri hi mehfil hai

Har ek rang tere roop ki jhalak le le

Ye aasman, ye tare, ye raaste, ye hawa tujhse khele

Har ek cheez hai apni jagah thikane se Kai din se shikayat nahin jamane se

Meri talash, teri dilkashi rahe baaki Bhagwan kare ye diwangi rahe baaki

Subah huyi lekin Sonali nahin uthi neend se yaa shayad jaanbhuj kar nahin uthi taaki school na jaa sake aur Jay se saamna na kar sake. Aunty ne dekha ki Sonali abhi tak nahin uthi to wo use utahne aayi. “Sonali beta uth jao school ke liye late ho raha hai”

 “Nahin mummy main ab school nahin jayungi”

 “Kya! Lekin kyun. Achanak kya ho gaya tumhe. Tabiyat to theek hai na tumhari”

“Tabiyat theek hai mummy lekin aaj kya ab main kabhi school nahin jayungi”

“Sonali aakhir tum school kyun nahin jaa rahi ye bataogi kya mujhe”

“Mummy aapne meri shaadi fix kar di. Aapki har ichha mujhe manjoor hai. Lekin kya aap iske badle mein mujhe school na jaane ki permission de sakti ho.” Ye kehte huye Sonali ki aankhen nam ho gayi thi.

Aunty samajh gayi ki wo school kyun nahin jaana chahti lekin fir bhi unhone kaha “Beti tere exams bas kuch hi din mein shuru hone wale hain. Kam se kam exams to de deti.”

“Nahin mummy ab main school nahin jayungi aur ye mera aakhiri faisla hai.”

 Aunty ne kaha “Jaisi teri marzi” aur keh kar baaki ghar ke kaamo mein busy ho gayi. Sonali bhi apne kamre mein gumsum padi apne bhaagya ko kosti rahi.

To be continued....